الماتىدا Infomatrix –Asia التىنشى حالىقارالىق كومپيۋتەرلىك جوبالار بايقاۋى باستالدى

بايقاۋعا ءبىر مەزگىلدە جاقىن جانە الىس شەتەلدەن كەلگەن 450 جوعارى سىنىپ وقۋشىسى قاتىسۋدا. دودانىڭ قاتىسۋشىلارى 7 ءتۇرلى  نەگىزگى كاتەگوريادان: روبوتوتەحنيكا, كومپيۋتەرلىك باعدارلامالاۋ, كومپيۋتەرلىك گرافيكا جانە ونەر, قىسقا مەتراجدى فيلمدەر, اپپاراتتىق باسقارۋ جۇيەلەرى, دروندىق جارىستار جانە ماتەماتيكالىق جوبالار بويىنشا كۇش سىناسۋدا.

- بۇگىنگى ءىس-شارانىڭ اۋقىمدىلىعىنا بەرەر باعا شەكسىز. بىرنەشە جىلدار بويى جوبانىڭ ونەرتاپقىشتار اراسىندا ماڭىزدىلىعى تەك عانا ارتۋدا. ارنايى جوبالار كورمەسىنىڭ دەڭگەيى وتاندىق جانە حالىقارالىق ساراپشىلاردان جوعارى باعاعا يە بولدى. اسىرەسە بيىلعى جىلى ەلىمىزدە «تسيفرلى قازاقستان» مەملەكەتتىك جوباسىنىڭ  قولعا الىنۋىمەن تۇسپا-تۇس كەلۋى – ءبىز ءۇشىن وتە ماڭىزدى. INFOMATRIX-ASIA – سدۋ ءۇشىن جىلدان جىلعا ەرەكشە داستۇرگە اينالۋدا.  2013 جىلى جوبادا 13 مەملەكەتتەن 190 ونەرتاپقىش قاتىسسا, بيىلعى جىلى 15 مەملەكەتتەن 450 ءجاسوسپىرىم قاتىسۋدا. جوبانىڭ باستى سەرىكتەستەرى – «دارىن» رەسپۋبليكالىق عىلىمي-تاجىريبەلىك ورتالىعى مەن قر بعم العىسىم شەكسىز, -  دەپ لەبىز ءبىلدىردى سالتاناتتى ءىس-شارادا سدۋ پرەزيدەنتى مەيىربەك ءماجيتوۆ.   

ۇيىمداستىرۋشىلاردىڭ ايتۋىنشا, بايقاۋدىڭ ماقساتى – اقپاراتتىق تەحنولوگيالار سالاسىنداعى شەبەرلىكتى شىڭداۋ, ءتۇرلى مەملەكەتتەن جوعارى سىنىپ وقۋشىلارى مەن وقىتۋشىلارىن بىرىكتىرىپ, ۇلتارالىق قاتىناستاردى نىعايتۋ, سونىمەن قوسا مەملەكەت مارتەبەسىن الەمدىك اقپاراتتىق كەڭىستىكتە اسقاقتاتۋعا باعىتتالعان.

بايقاۋ كورمەسىندە ونەرتاپقىشتار سان ءتۇرلى جوبالارىن كوپشىلىك نازارىنا ۇسىنعان. اسا شىعارماشىلىق تاپقىرلىعىمەن ەرەكشەلەنگەن جوبالار زاماناۋي قوعامدا قارقىندى دامىپ كەلە جاتقان روبوتوتەحنيكا باعىتىنان, سونىمەن قاتار قوعامداعى سۋيتسيد, قورشاعان ورتانى قورعاۋ, ۇلكەنگە دەگەن قۇرمەت, شىنشىلدىق سىندى وزەكتى تاقىرىپتارعا تۇسىرىلگەن قىسقا مەتراجدى فيلمدەرمەن ەرەكشەلەندى.  توپ جارىپ ۇزدىك اتانعان جوبا اۆتورلارى 15-ساۋىردە ىرىكتەلىپ,  وقۋ ورنىنىڭ 100% گرانتىمەن ماراپاتتالادى. سونىمەن قاتار 4 جىل بويى ۋنيۆەرسيتەتتىڭ ينجەنەرلىك جانە جاراتىلىستانۋ فاكۋلتەتىندە تەگىن ءبىلىم الۋعا مۇمكىندىك الادى.